登登登凳！
登登登鄧！
喱 D士 and精屠民！細路哥 and大人！
各位唔駛四圍騰，坐定係度搵老襯。
歡迎來到熊貓電視台－－呢個唔收錢都有得睇，一收錢你就唔Q會睇的電視台。
我係呢度的台長、兼打雜茶水清潔大隊長－－熊貓王。本人承諾，定當歇盡所能，全力以赴，不徇私、不偷懶、不定期更新，貫徹特首「以盲為本，冒失進取」的施政方針！落實「講人自講，高度字字」的大方向！
本台有幸與「屎眼網」合作，(即類似做地盤又話自己與李X誠「合作」搞地產那種「合作」)，配合或者係最先進的儀器，在廿一世紀為各位提供高清質素的文字與富藝術氣息 (即「鬆郁矇」) 的圖片。
為「龍仲歧視」，未開始今日簡單唔隆重的開台儀式前，我地請到熊貓飛星術濱州派第一袋掌門人，兼本台玄學台駐台大法師－－熊貓居士，為我地占一卦，祈求來年順順利利，唔會俾人告，唔會塌台……有請熊貓居士！
熊貓居士(唸唸有辭，作勢擲毫)：
開！買定離手！水雷屯，有水有雷仲有水雷，而且仲要係好多水雷屯積四週，你話會點？水雷屯，唔死骨都斷。詩曰：水遇著雷，是觸電死的意思啊！萬事起頭難……
台長：啋！啋！今日大好日子，唔好講埋呢 D野，頭先果下係演習，再黎過再黎過……
熊貓居士(又擲一卦)：君子舉手不回！開！水山蹇，上水下山，唔死骨都殘。山遇著水，天馬折足無路去啊！
台長：下？咁邪？唔算唔算，再來……
熊貓居士：三個六返大陸！開！澤水困！困者，難也，一碌木被圍，唔老黎也！
台長：唔算唔算，你手風差，今次等我自己黎－－開黎見我！
熊貓居士：睇過……陰陽陰 陰陽陰，上水下水，坎為水，二水重疊，是為可怕的漩渦。
台長：有無搞錯！今日咩日子？我俾足錢你條乜乜，做乜講親都係唔好野？
熊貓居士：我話你有無搞錯就真，明知今日唔好日仲黎開台，好啦，家陣「四大難卦」俾你一日扑齊，你自己諗掂佢啦。哼！(轉身走)
台長：唔好理佢！我自已解，水為財，四卦都有水，即本台有「水」，坎卦兩重水，仲唔係「疊水」？水雷屯－－萬事總是起頭難，水山蹇－－有乜野唔會有阻滯？澤水困－－人總有軟弱的時候，坎為水－－乜都好啦，水是萬物之源，有水就有希望。
李老子都話物極必反，總之跌到谷底唔破產就會反彈，百無禁忌啦！
於是，熊貓電視台，終於，成立了！
(鼓掌)
